O mércores día 2 de decembro ás 20h celebrarase no local social do Ateneo de Santiago, sito na Praza de Salvador Parga, 4-2º, un coloquio sobre a crise de refuxiados, coa presenza de representantes de Médicos Sen Fronteiras (MSF).
Miles de persoas fuxen da guerra e a miseria e as barreiras para chegar a Europa empúxanos a rutas cada vez máis perigosas. O mundo enfróntase á peor crise de Refuxiados dende a Segunda Guerra Mundial.
En 1971 un pequeno grupo de médicos e xornalistas fundou Médicos Sen Fronteiras en París. Hoxe en día contan con 19 seccións, máis de 32.000 profesionais no terreo e o apoio de máis de 5 millóns de socios e colaboradores nos cinco continentes, sendo unha das maiores organizacións humanitarias independentes do mundo. A súa misión é dar asistencia a poboacións en situacións de crise, sen discriminación por raza, relixión ou ideoloxía política. En maio, ante a grave crise de refuxiados, iniciaron unha operación marítima no Mediterráneo con tres barcos que rescataron xa a máis de 15.000 persoas e continúan traballando dándolles atención médica na súa longa ruta e nos seus países de orixe. En 1999 recibiron o Premio Nobel da Paz.
comment closed