Os martes, 19 de novembro e 3 de decembro, ás 17.30h na biblioteca do Ateneo (Praza de Salvador Parga, 4-2º) terá lugar dúas sesións do Club de lectura do bloque “Narra a túa propia aldea coma se fose universal”, nas que se comentará a obra En el tiempo de las mariposas de Julia Álvarez.

En el tiempo de la mariposas narra a loita das irmás Mirabal contra a  ditadura do xeneral Trujillo na República Dominicana. A obra retrata as represalias sufridas pola familia a mans do Servizo de Intelixencia Militar, que levou á morte a tres das catro irmás. A novela representa a perspectiva destas, destacando a Dedé, a única que sobreviviu.

A novela de Julia Álvarez recibiu varias adaptacións para cinema e teatro. O director Mariano Barroso levouna á gran pantalla da man de actores como Salma Hayek, Edward James Olmos ou Marc Anthony. En 2018 en Washington D.C. adaptouse a obra para o teatro dirixida por José Zayas, gañando catro títulos nos BroadwayWorld Washington DC Awards 2018.

A autora da novela, Julia Álvarez (Nova Iork, 1950), malia nacer nos Estados Unidos, criouse na República Domicana e regresa ao seu país natal con 10 anos, onde se licenciou en Filoloxía con matrícula de honra. Actualmente, compaxina a poesía, na que se estreou con Homecoming, coa narrativa, con outras novelas como Cuando tía Lola vino (de visita) a quedarse ou Antes de ser libres.

Lembramos que esta actividade ten un prezo de 15€/trimestre, a aboar en outubro, xaneiro e abril (todas as achegas realizadas ás entidades sen ánimo de lucro declaradas de utilidade pública teñen deducións na declaración do IRPF). A día de hoxe as prazas ofertadas atópanse cubertas polo que aqueles que queiran participar poderán inscribirse nunha listaxe de agarda no enderezo electrónico ateneo@ateneodesantiago.com.