O sábado, 25 de maio, o Ateneo de Santiago organiza un roteiro polo románico da Comarca do Baixo Miño, guiado pola historiadora da arte Maricarmen Sánchez Carrera, co seguinte programa:

8.30h. SAÍDA DA RÚA DA ROSA DE SANTIAGO.

MOSTEIRO DE SANTA MARÍA DE ARMENTEIRA: Mosteiro cisterciense do século XII. Da fábrica orixinal só queda a magnífica igrexa. O mosteiro, propiamente dito, ten un claustro do século XVIII e na actualidade está ocupado por monxas, tamén do Císter, que atenden unha hospedería e elaboran xabóns e outros produtos.

Mosteiro de Armenteira

SAN BARTOLOMEU DE REBORDÁNS: Sobre ruínas romanas levantouse un templo prerrománico que se reformou no s. XI e XII. Cumpriu a función de Catedral de Tui durante un tempo. Conserva uns estupendos capiteis do primeiro románico.

SAN MIGUEL DE PEXEGUEIRO: É o que queda do mosteiro fundado no s. X polos condes Gonzalo e Teresa (os mesmos de Carboeiro e Camanzo). Refórmase no s. XII. Ten unha interesante portada e unha pía bautismal moi interesante.

SANTA MARÍA DE TEBRA: Foi igrexa da orde de Malta e conserva  moi bos capiteis e canecillos.

XANTAR no restaurante «Las Colinas» de Tebra. Menú:

• Aperitivos:

Croquetas
Mini empanadillas caseiras
Calamares

• Prato principal (a elixir): Pescada á romana ou Tenreira asada
• Sobremesa
• Café
• Viños

SANTA MARÍA DE TOMIÑO: Consérvase moi ben e ten unha grande influencia da catedral de Tui e de Braga.

SANTA MARÍA DE OIA: Único mosteiro cisterciense situado a pé de mar para exercer un labor defensivo. Fundado no s. XII. O interior da igrexa responde ás características típicas do Císter. A fachada é do XVIII. O interior do mosteiro conserva zonas de distintas épocas que ata agora estiveron en moi mal estado de conservación.

Mosteiro de Oia

SANTA MARÍA DE BAIONA: A súa fachada á, practicamente, unha copia da que foi fachada do Mosteiro de Oia, polo que é dobremente interesante. Foi construída no s. XIII sobre outra anterior e é xa de transición ao gótico. (Ao estar en obras só a poderemos ver por fóra).

O prezo final é de 35€ por persoa, incluíndo autobús, comida e visitas, cun suplemento de 10€ para os non socios do Ateneo. As inscricións deberán realizarse no enderezo electrónico ateneo@ateneodesantiago.com ata o luns, 20 de maio, indicando o prato principal elixido e admitíndose unicamente a inscrición dun máximo de dúas persoas en cada solicitude. O número de prazas dispoñibles é de 28 e serán adxudicadas por orde de solicitude con preferencia para os socios do Ateneo.